গাওঁ একাধাৰে নগৰৰ জনক-জননী –ভাব সম্প্রসাৰণ

গাওঁ একাধাৰে নগৰৰ জনক-জননী — ভাব সম্প্রসাৰণ

মানুহে সমাজ পাতি বসবাস কৰাৰ লগে লগে গাওঁৰ জন্ম হৈছে বুলি কোৱা হয়। গাওঁৰ তুলনাত নগৰ হৈছে বহু যুগৰ পিছৰ সৃষ্টি। নগৰ সৃষ্টিত গাওঁৰ মানুহেই আগভাগ লয়। উদ্যোগ বা চৰকাৰী অফিচ আদালত আদিৰ ওপৰত ভিত্তি কৰি নগৰৰ সৃষ্টি হয়। পিছত চাকৰিজীৱি আৰু উদ্যোগৰ লগত জড়িত মানুহে নগৰৰ জন্ম দিয়ে। নগৰত সাধাৰণতে সা-সুবিধা বেছি থাকে যদিও নগৰৰ মানুহে ইয়াৰ প্ৰয়োজনীয় কেঁচা সামগ্ৰী, খাদ্য বস্তু আদিৰ বাবে গাওঁৰ ওপৰতেই নিৰ্ভৰ কৰিব লগা হয়। কাৰণ গাওঁ অঞ্চলতহে কৃষিজাত সামগ্ৰী উৎপাদন কৰা হয়। গাওঁ অঞ্চলৰ মানুহে যদি সিহঁতৰ উৎপাদিত সামগ্ৰী চহৰলৈ ৰপ্তানি নকৰে, তেন্তে চহৰ অঞ্চলৰ মানুহে প্ৰয়োজনীয় খাদ্য সামগ্ৰীৰ অভাৱত মৰি যাব। তেতিয়া চহৰৰ কোনো অস্তিত্ব নাথাকিব। আনহাতে গাওঁৰ মানুহেহে দেশৰ ঐতিহ্য, পৰম্পৰা, কৃষ্টি, সভ্যতা আদি ধৰি ৰাখিব পাৰে। নগৰ অঞ্চলত ভিন ভিন ঠাইৰ মানুহ আহি বাস কৰে বাবে সিহঁতে নিজৰ নিজৰ কৃষ্টি-সভ্যতা ধৰি ৰাখিব নোৱাৰে। সেয়ে গাওঁক নগৰৰ ‘জনক-জননী’ অৰ্থাৎ পিতৃ-মাতৃ বুলি কোৱা হয়। কথাষাৰৰ  যথাৰ্থতা আছে।

উৎস গ্রন্থঃ অসমীয়া ভাৱ সম্প্ৰসাৰণ

Leave a Reply

Your email address will not be published. Required fields are marked *